في ساحة الشعر لا تسأل عن الوضع كيف
وأسأل عن السوق واللي ورد بضاعته
يوم القصايد بضاعة شاعر ما يصيف
عن محور الشعر والتصوير بحمايته
معروف في حبكة المعنى ثقيل وخفيف
والشاعر الفذ يرسمها على فاقته
يرقى بفكره الى الجزله بضلع منيف
ويقدم الشعر لأهل الشعر في باقته
ما يقبل الهزل والمعنى يجيبه شريف
ويخاطب أهل العقول ويحترم ساحته
والشاعر الكفؤ عند الناس منزال سيف
ماهوب محتاج يوم الناس في حاجته
وبضاعة الرخص في الاسواق مرسال صيف
وقته قصير ومضمونه على ساقته
واللي جلبها بسوق الشعر ماهو يضيف
ليته تريح ما دام الضعف في طاقته
والشعر حزمة مشاعر في يدين العفيف
منها تفوح العطور وريح ريحانته
وانا دخيلك ياراعي الشعر فوق الرصيف
لا تشغل الناس والمقصود في خانته
ترى مزاج البشر ماهو سوى يا حريف
وأذواق الاصحاب بعض احيان متفاوته
والعنصريه لها دور ولا هو طفيف
لا والله الا ترد الشخص عن طاعته
حتى لو انك مجرد قلت بيت ضعيف
ولا قصيده تميت القلب في ساعته
يقلون لك ويش هذا الداهيه يا لطيف
رتويت يا اصحابنا والصمت شماعته
وانا الى من سألني راعي الشعر كيف
اقول له ( كل سوق نعرف بضاعته )
التعليقات